[Note: the following is taken from Marchegay, Paul, "La rançon d'Olivier de Coëtivy, seigneur de Taillebourg et sénéchal de Guyenne, 1451-1477", in Bibliothèque de l'École des Chartes, t. 38, 1877, pp.5ff., pp.18ff. I corrected typographical errors due to the OCR system misrecognition, but there may still exist such errors. Please consult printed version for academic purpose. Another copy is available at gallica: pp.5ff, pp.18ff. S. U.]
Certification that sealed letters for the delivery of Lord of Taillebourg is confered to Talbot Herald (1454).
IV. — 26 septembre 1454.
CERTIFFICACION PAR QUOY IL APPERT QUE LES SÉELLÉS POUR LA
DÉLIVRANCE DE MONSr DE TAILLEBOURG FURENT BAILLÉS A
TALBOT LE HÉRAULT.
A tous ceulz qui ces présentes lettres verront, Nicole Quinepaye,
prestre, natif d'Abbeville, notaire impérial et appostolique,
salut.
Savoir fay que aujourd'ui vingt sixiesme jour de septembre,
l'an mil quatre cens cincquante quatre, en ma présence et en la
présence de Guillame Saillant, bourgois dudit lieu d'Abbeville,
et de Drouet le Prévost, clerc de la sénescauchée de Pontieu,
Guillaume de Braquemont, soy disant procureur de messire
Olivier de Coictivy, chevallier, ad présent prisonnier ou païs
d'Angleterre à monsr le conte de Chorosbery, sire de Talbot, a
baillié et délivré à Talbot, hérault dudit conte de Chorosbery, le
nombre de six séellés faisans mencion de la délivrance et raençon
dudit messire Olivier de Coictivy, donnez c'est assavoir :
Les deux de très haulx et puissans princes monsgr le conte du
Maine et monsgr Jehan conte de Clermont ; lequel séellé donné
dudit conte du Maine est escript en parchemin, signé de sa main
et séellé de son séel armoié de ses armes, en simple queue et
chire de vermeil ; et l'autre est escript en pappier, signé de la
main de mondit sgr le conte de Clermont et séellé en placquart de
son séel en chire vermeil ; chascun d'iceulx séellés faisans
mencion de la somme de six mille cent nobles, une douzaine de
vaissielle garnie, pesant cent mars d'argent, et ung coursier bon
et souffisant.
Les autres quatre séellés, escrips tous en pappier, donnés
c'est assavoir : l'un d'iceulx de monsgr le conte de Laval, le
second de monsgr d'Orval, le tiers de monsgr de Bueil admiral
de France, et le quart de messire Jehan d'Estouteville, seigneur
de Torchy, maistre des arbalestriers de France. Tous iceulx
quatre séellés signés de leurs saings manuelz et séellez de leurs
séeaux, en placquart et chire vermeil, armoiés de leurs armes ;
et faisans chascun mencion de pareille somme de cincq mille cent
nobles, ladicte douzaine de vaissielle pesant cent mars d'argent,
et coursier dessusdiz, et chascun pour le tout.
Lesquelles choses dessusdictes sont plus au long spéciffiées et
déclairées ès lettres certifficatoires et autentiques données à
Chasteillon sur Yndre, séellées de séeaux roiaux establiz aux
contractz de la court du Roy nostre sire audit Chasteillon, et
signées des saings manuelz de Jehan de Lomeau, notaire roial
audit Chasteillon, et Guillaume Gouget, notaire appostolique, de
ce faisans mencion, dactées du xije jour de ce présent mois de
septembre ; et aussi ès certifficacions faictes au dos de chascun
desdis séellés, signées par les noctaires dessusdis. Les quelles
lettres auctenticques ont estées baillées audit héraut, pour les
quelz séellés et lettres porter oudit païs d'Angleterre, ausdis
seigneur de Talbot et Olivier de Coictivy, et iceulx emploier et
convertir à la délivrance et raençon dudit messire Olivier,
détenu prisonnier oudit païs d'Angleterre, comme dit est dessus.
Et oultre plus a esté baillée et délivré par icellui Bracquemont,
à icellui Talbot, héraut, en nostredicte présence, ung autre
séellé en pappier, portant en son effecq quictance pour ledit messire
Olivier de Coictivy, donné de très hault et puissant seigneur
monsgr le conte de Dunois, signé de sa main et séellé de son
proppre séel en placquart, adréchant à mondit seigneur de Chorosbery,
de la somme de dix huit cens escus d'or pour iceulx
rabattre et déduire de la finance et raençon dudit messire Olivier
par ledit sire de Talbot, sur les séellés que mondit seigneur de
Dunois a de monseigneur le conte de Willechierre et autres
seigneurs du royalme d'Angleterre, pour la finance de Jehan
Ormond, escuier, frère dudit sire de Willechierre, prisonnier de
mondit seigneur de Dunois, et lequel séellé est certiffié au dos
d'icellui par Normandie, roy d'armes, ainsi que ce il appert par
son saing manuel mis en pose à ladicte certifficacion.
Et si a esté encorres baillé et délivré audit Talbot, héraut
dessusdit, ung saufconduit, donné de mondit seigneur l'amiral de
France, pour une nef de trois cens tonneaux et au desoubz, dacté
du xxiiije jour dudit mois de septembre, et icellui porter à icellui
sire de Talbot oudit païs de Angleterre, pour valoir en l'acquict
de la finance dudit messire Olivier ce qu'il plaira à icellui conte
de Chorosbery.
Desquelx six séellés dessusdis, lettres auctenticques, aveuc de
cellui faisant mencion desdis xviije escus et saufconduit, ledit
hérault s'est tenu et tient pour bien contempt, et iceulx pour
léalment receuz. Et si a promis de tous iceulx séellés, lettres et
saufconduit porter, à son povoir et au mieulx qu'il porra, audit
païs d'Angleterre, et iceulx bailler et délivrer audit conte de
Chorosbery et audit messire Olivier de Coictivy, pour et en
l'acquit, descharge et délivrance d'icellui Coictivy, ainsi et par
la manière que lesdis séellés le contiennent ; et de toutes les
choses dessusdictes ledit héraut a tenu et tient pour bien et deubement
deschargié icellui Guillaume de Bracquemont. Et à toutes
les choses dessusdictes faire, baillier et délivrer et recepvoir,
Taillebourg, poursuivant dudit messire Olivier de Coictivy, a
esté présent et a promis, en ma main, de conduire et aler aveuc
ledit hérault oudit païs d'Angleterre, devers sondit maistre.
Et quia ego Nicolaus Quinepaye, presbiter Ambianensis
diocesis, publicus apostolica et imperiali auctoritate notarius,
hujusmodi litterarum tradicioni et recepcioni ceterisque
omnibus premissis et singulis, una cum prenominatis testibus,
presens interfui eaque sic fieri vidi et audivi, in notam
sumpsi, ideo hoc presens publicum instrumentum, manu
aliena, me aliis negociis prepedito, vulgari tamen sermone
fideliter scriptum, hic me subscribendo signavi, in fidem,
robur, et testimonium premissorum, requisitus et rogatus.
QUINEPAYE.
Original en parchemin. La signature du notaire apostolique représente
un trophée formé par deux clefs et divers ornements. Il est élevé sur un
piédestal composé de quatre marches, sur la plus haute desquelles est écrit
le nom.
V. — De janvier à mai 1455.
Retour en France d'Olivier de Coëtivy ; et lettres-patentes
de Charles VII, lui confirmant, pour son office de sénéchal
de Guyenne, la pension ordinaire de 1,200 livres,
avec une autre pension de même somme, pour tenir
plus frèquemment les Assises ordinaires en certains
lieux de la sénéchaussée.
Despence et mise faicte pour monsgr le séneschal de Guienne,
depuis qu'il est venu d'Angleterre et arrivé à Amboyse, par moy
Paulet Baudry, son serviteur.
Et premièrement le vendredi, derrain jour de janvier, à Saint
Jehan d'Angely, baillé à Pierre Champdoutée, pour porter à
mondit sgr audit lieu d'Amboyse, liiij escuz, valent lxxiij livres
v solz.
Item en despence faicte par maistre Jehan et moy à aller de
Taillebourg à Mehun sur Yèvre, où estoit mondit sgr, ij escuz,
valent lv solz.
Le mardi [25 février] à Taillebourg le poursuivant, du commandement
de mondit sgr, xx escuz, pour aller à Calays conduire
Talbot le hérault, pour ce xxvij livres x solz.
Extrait d'un compte original.
(...)
Related materials
Basin, Thomas, Quicherat, Jules Étienne Joseph (ed.), Histoire des règnes de Charles VII et de Louis XI, vol.4, Paris: veuve de Jules Renouard, 1855. (Internet Archive.)
There are mentions to the Earl of Shrewsbury's officers of arms: herald Scherosbery or Chierosbery mentioned in p.307 and 319; and pursuivant Fornival
mentioned in p.312, 316-7, 319. The year is c. 1448-9 (see p.299, 311, 318).
back