Letters Patent of Emperor Charles V creating Antoine de Beaulaincourt Toison d'or King of Arms (1550). (In French.)

About the text

The text

CHARLES, par la diuine clemence empereur des Rommains, tousiours auguste, roy de Germanie, de Castille, de Leon, de Grenade, d'Arragon, de Nauarre, de Naples, de Maillorcque, de Sardenie, des Ysles, Indes et terre ferme de la mer Oceanne, archiduc d'Austrice, duc de Bourgoingne, de Lothier, de Brabant, de Lembourg, de Luxembourg et de Gheldres, comte de Flandres, d'Artois et de Bourgoingne, Palatin de Haynnau, de Hollande, de Zeellande, de Ferrette, de Haguenault, de Namur et de Zuphen, Prince de Zuauen, marcquis du sainct empire, seigneur de Frise, de Salins, de Malines, des villes, cite et pays d'Utrecht, Oueryssel et Groeninghe et dominateur en Asie et en Affricque, A tous ceulx qui ces presentes lettres verront, Salut. Comme il nous ait este de besoing pourueoir a lestat de nostre conseillier et premier roy darmes de nostre ordre de la Thoison dor, presentement vacant parceque nostre tres chier et feal cheualier Francois de Phalaix dernier possesseur du dict estat lait prins nagueres de son bon gre et pour aucunes raisons ad ce le mounans remis librement en nos mains, Et que par la deliberation et élection de nous comme chief et souuerain et de nos tres chiers et leaulx freres et compaignons cheualiers de nostre dict ordre estans lez nous, ayons trouue que nostre tres chier et feal cheualier Anthoine de Beaulaincourt lieutenant de nostre gouuernance de Lille seroit personnaige ad ce idoine et qualifie, SCAUOIR FAISONS, que pour le bon rapport que nous auons dicelluy, Confians a plain de ses leaulte, prudence, experience et bonne dilligence, Nous lauons faict, cree, declare, constitue et couronne nostre conseillier et premier roy darmes de nostre dict ordre, En luy donnant nom et tiltre de Thoison dor auec pooir, faculte et auctorite de faire tous actes de publications, sommacions, requisitions, deffiances et autres exploitz que conuiennent à conseillier et premier roy darmes en quelque lemps que te soit de paix ou de guerre, Ensemble dauoir regard sur les autres officiers darmes de quelque nom ou qualite quilz soient et tous autres portant les armes de nous, nos vassaulx et subgectz, les instruire et addresser au faict et conduite de leurs offices, Et generallement toutes et singulieres les choses que bon et leal conseillier et roy darmes peult et est accoustume de faire et que le dict de Phalaix et ses predecesseurs conseilliers et royz darmes ont faict et sont accoustume de faire, aux gaiges, honneurs, pensions, prerogatines, preeminences, libertez, franchises, exemptions, hostelaiges, liuraisons, prouffitez et emolumens y appartenans. Sur quoy et de soy bien et leaulment acquiter au fait et exercice du dict estat et office de conseillier et roy darmes, le dict Anthoine de Beaulaincourt a ce jourdhuy fait le serement pertinent en noz mains selon les statutz et ordonnances sur ce obseruees au fait du dict ordre. Si donnons en mandement a nos dictz freres, compaignons, cheualiers, chancelliers et autres officiers de nostre dict ordre et a tous autres quil appartiendra que ilz tiennent et reputent le dict Anthoine doresnavant pour nostre conseillier et premier roy darmes de nostre dict ordre et diceluy estat, ensemble des honneurs, droitz, prerogatiues, preeminences, libertez, franchises, exemptions, et tous autres preuileges auant ditz, ils et tous autres noz justiciers, officiers, seruiteurs et subgectz et chacun deulx en droit soy et si comme a luy appartiendra, le facent, seuffrent et laissent plainement, paisiblement joyr et user, cessans tous contredictz et empeschemens au contraire. Mandons en oultre a nostre recepueur general de nostre demenie et finances present et aduenir, le contenter, payer et satisfaire de ses gaiges ad ce ordonnez, Et a ceulx de notre chambre des comptes a Lille que en rapportant cestes, vidimus ou copies dicelles fait soubz scel auctenticque, ou copie collationnee et signee par le greffier de nostre dict ordre ou lun de nos secretaires pour une et la premiere foiz, ilz allouent es comptes de nostre recepueur general ce que au dict Thoison dor sera paye et nombre sans aucun contredit ou empeschement, nonobstant quelconques mandemens, ordonnances ou restrictions ad ce contraires, car ainsi nous plaist-il. Donne en nostre ville de Bruxelles, le XXIX^e jour de may de lan de grace mil cincq cens cincquante, de nostre empire le XXXI^e et de noz regnes de Castille et autre le XXXV^e.

CHARLES.                               

J. DE MONTMORENCY (2). BOISOT. J. DAMHOUDERE (3). VAN LOO (4).

Related materials

back