Le Passe temps d'oysiveté

« A ce je puis bien a grant paine
Faire response qui soit seure ;
Dieu conduyt nos fais et les maine,
Et les parfait en temps et heure.
Souvent en desplaist la demeure²
Tant qu'a peu pres on pert espoir.
Deuil est attendre et rien avoir.

« Ce qui est en conseil des hommes
Est doubteux et branle souvent,
Ne plus ne mains comme le somme
Au chef ennuyé et dolent :
L'ung argue, l'autre deffent ;
Ire s'i foure et passion.
Sot ne vient a conclusion.

« L'ung conseille¹ paix, l'autre guerre,
Chascun en parle d'apetit ;
Il semble a l'ung qui doit conquerre
Bon los² d'estre fier et despit³ ;
Quelcun craint et se desconfit
Et fait des doubtes ung millier.
Bon sens duit bien au chevalier.

« Touteffois, puis que vient a dire
Vous semble paix estre si bonne ? »

— « Mais qui veult tout¹, dis je, espluscher,
Mieulx vault par aventure noise.
Qui l'une et l'aultre branle et poise²
Tost le pourra apparcevoir.
Cherchier fault pour le vray savoir.

« De ce vous me donnés merveille ;
Legierement le puis prouver.
Escoutés et ouvrés l'oreille
Et vous laissés duire et mener.
Je suis content de raisonner
Selon mon povre sentement³.
En parlant vient l'entendement.

« Je dis donc, et est verité,
Que nature humaine est coquine ;
Elle ayme et quiert oysiveté,
Et a le cueur a la cuisine.
S'elie treuve qui la dodine.
Elle chome du jour la plus part.
Ayse fait l'homme estre festart.

« Ou, se¹ non, elle tournera
Son fait en quelque paillardise ;
Ou par orgueil riotera
A toy ou aultruy, c'est la guise.
Force est que l'esprit d'homme vise
Ou muse a une autre chose.
Tel est couché qui ne repose.

« Paix souhaite² aise, aise oysiveté ;
Oysiveté songe malice ;
Malice convoite a planté,
Convoiteux n'a loy ne³ justice,
Ou justice n'a, mais a vice⁴,
Par lequel tout est destourné.
Trop gigue cheval sejourné⁵.

« Nous sommes comme pors en l'auge,
Si tost que repos nous aouyle¹ ;
Richesses nous viennent a bauge
Esquelles chacun naque² et fouylle ;
En son ordure l'ort se touylle³,
Et plus en plus s'y envelope.
Moult va droit qui jamais ne choppe.

« Paix les delices entretient ;
Les delices font l'homme gourt ;
Hanibal, se bien m'en souvient,
Congneut jadis dont tel mal sourt
Quant a Capuë, comme lourt,
Print ses plaisirs oultre l'enseigne⁴.
Il n'est si fort qu'aise ne gaigne.

« Alixandre, qui tant a de bruit
Comme preux et grant conquerant,
Il gousta de ce mauvais fruyt
Au païs de Perse la grant,
Ou par plaisance cuida tant
Que comme Dieu on l'adoroit.
Qui trop a tost se descongnoist.

« Qui amollia le courage
Du douillet Sardanapallus¹,
Qui de filler aprint l'usage
Et fut mol comme femme ou plus,
Sinon d'aise l'abondant flus
Et de paix la longue asseurance ?
Apres grant plaisir grant soufrance.

« Pourquoy tumba en la fontaine
Narcisus, et la se noya,
Sinon qu'en paix la souveraine
Ses plaisances tant pourchassa ?
Se Fortune l'eust de pieça²
Travaillé, bien s'en fust retrait.
Vice par mal a bien se traict.

« Absalon³, le beau chevelu,
Le filz et l'amour de David,
Qui tant le força qu'il voulu
Prendre sa seur a tel delit ?
Il estoit en paix tout confit ;
Aise le suivoit plus qu'a point.
Bien ne scet qui n'est de mal point.

« Regardés apres quelque peu
Le repos et l'aise des dames,
Qui ne querent qu'esbat et jeu
Et froter leurs dois et leurs palmes,
Dont plusieurs ont esté infames
Et souvent leur en est mal prins.
Trop asseuré est tost surprins.

« Senyramis, l'Assyrienne,
Quant Belus¹ son mary fut mort,
Elle se vit grant terrienne,
Et print son soulas et deport,
Tant que desir l'enflamma fort
D'avoir son filz oultre nature.
Souef nourry ayme luxure.

« Dyna, la fille d'ung Ebrieu²,
A merveille mignote pucelle³,
Oysive et baude⁴ contre Dieu
Descendit fringante⁵ et ysnelle⁶,
Et voulut voir la gent nouvelle.
Elle en fut tout a coup ravye.
Cueur bauld et fol trop se devye.

« Qui fist aler dame Helaine
Voir Paris qui venoit de Troye,
Fors Gayelle¹ la trop mondaine
Qui a Paris luy en fit proye ?
Mignotise chatoule et froye²
Dame qui n'a soing ne besongne.
Nul n'est chaste si ne besongne.

« Les dames Sabines, jadis,
Regardans les jeux des Romains,
Furent prinses sus estaudis³
Non obstant leurs cris et leurs plains ;
Elles cheurent toutes es mains
De l'ung et l'autre, pelle mesle.
Fol est qui d'autruy jeu se mesle.

« Par les Ebrieux preuve mon cas
Qui en servage furent bons ;
Mais, quant manne leur cheut a tas,
Ilz furent ingras des haux dons ;
En leur ost firent [des] chansons,
Adorans l'idole d'ung veau.
L'homme est bon tant qu'il craint sa peau.

« Pour ce, vault mieulx, ce¹ dit le Sage²,
Aler en lieu ou on gemist
Que d'estre en disner davantage
Ou chascun se rigole et rit ;
Car delice ouvre l'appetit
Et le desordonne et desvoye.
Moyen dueil vault mieulx que trop joye.

« Je n'obliroy point Messaline,
Au temps de Glaude l'emperesse,
Qui en son aise femenine
Fut ville et salle jangleresse³ ;
Jamais ne fut soule de presse
Qu'omme luy fist, tant estoit pute.
Oeuil esgaré tire hors bute.

« Montons plus hault, jusques au ciel ;
Nous verrons que les grans delices
Engendrerent es anges fiel
Et cheurent d'estas et d'offices.
Qui a tousjours grans benefices
En son aise se treuve abusé.
Plaisir trompe le plus rusé.

Or, pour mettre fin a ce point,
Congnoissons que Dieu crea l'homme,
Et de labourer luy enjoint
En paine et sueur sans qu'il chome,
Pource qu'en paix mengea la pomme
En son terrestre paradis.
Apres ung mal en viennent dix.

Paix doncques est bien a doubter
Qui fait tant d'inconveniens :
On voit en paix garsons muser,
Estre oyseux en bours et aux champs,
Jouer aux dez et aux berlans,
Hanter bordeaux et tous hasars.
Qui neant fait vit de mauvais ars. »

« Je croy assé, dis je, qu'en Londre
A maint bon et vaillant docteur ;
Mais ne doutés³ et soyez seur
Qu'il n'y a qui ne contredise.
Verité n'a rien qui luy nuise.

« Si dis encore plus avant
Que guerre est bonne et necessaire,
Et trop mileure⁴ tant pour tant
Que telle paix pourroit on faire ;
Nature assés le nous declaire,
Ce n'est point moy qui telz ditz treuve.
A toute doubte fault la preuve.

« Quatre elemens sont en nature
Tous de diverse qualité,
Et entre tous eulx tousjours dure
Et durera diversité :
Car, se n'estoit l'iniquité,
Tout seroit feu, eaue, aeir ou terre.
Nature y a mis ceste guerre.

« Ceste guerre est dedans nos corps
Des l'heure que fumes engendrés :
Qui est qui ne voit les discors ?
Pensés y, vous les entendrés ;
Le froit et [le] chault congnoistrés,
De sec et de moyte le bruyt.
Sans tel discort l'homme est destruyt.

« Encore y a autre discort
Qui dedens nous se fait et maine ;
L'ame et la char ne sont d'acort.
L'une est rassize et l'autre vaine ;
L'ame doit estre souveraine
Et la char doit estre subjecte.
Ennemy vainc qui ne s'en guette.

« Par ces¹ deux l'homme est peloté
« Ça et la, et ne scet qu'en faire :
Raison le dresse a verité,
Sensualite, au contraire,
Tant², qui³ se tourbe⁴ en son affaire
Et fait souvent ce qui⁵ ne veult.
Grant dueil a qui veult et ne peust,

« En tel debat vertu se monstre
Et les bons y prennent merite ;
C'est ung fier et merveilleux monstre
Que la char qui tant est despite⁶ :
Victoire n'y a pas petite
Qui la peut renger et bien duyre.
Tel n'aide rien qui peut bien nuyre.

« Par ce moyen tout nostre cas
Est en guerre continuelle,
Ce que Nature ne fait pas
Sans que Raison soit avec elle ;
Autrement trop seroit cruelle
Se pour noiser nous avoit fait.
Je croy que mal rent pour bien fait.

« C'est la Raison qui meut Nature
De mettre en l'homme telle¹ guerre,
Affin qu'il n'y mist trop sa cure
D'avoir son paradis en terre,
Mais qu'il se penast de conquerre
Par ses haulx faiz honneur et gloire.
Bon cueur combat pour la victoire.

« Et pour mieulx voir, que je ne faille,
Voyons la nature des bestes :
Entre elles toutes a bataille
Et se menguent et piedz et testes ;
Voiez les noises et tempestes
Que Nature a produit en elles.
Nulle gent n'est qui n'ait querelles.

« Les chatz poursuivent les soris ;
Les chiens persecutent les chatz ;
Le loup menguë les brebis ;
Le loutre poisson maigre ou gras ;
Le regnart [fait] plusieurs fatras²
Pour decevoir coq ou geline³.
Chascun a chose qui le myne.

« Esprivier¹ quaile persecute ;
Furon² suit³ apres le connin ;
Le lyon contre l'ours s'abute⁴,
Et triacle⁵ het le venin :
Et l'eaue est contraire a bon vin ;
Le vent gaste la forte espice.
Qui n'est fort use de malice.

« Et l'air les vens contraires sont ;
En mer ont guerre les poissons,
Et les estoilles au ciel ont
Qualités⁶ de moult de façons ;
Feu, tonnoire, naige, glaçons
Ont des planetes leur naissance.
Rien, fors Dieu, n'est sans dissonance.

« L'homme, mesmes, combien a il
D'ennemis qui luy font bataille ?
Il en a plus de trente mil,
Comme pous et telle mardaille :
Puces, taons de grosse taille
Fievre, pierre, bosse⁷ et colique.
Il n'est homme qui n'ait sa picque.

« Melancolie et vermoquant¹
Rompent la teste tous les coups ;
Ire et despit, le mal plaisant,
Luy font enfler vaines et poulz ;
Amour le fait estre jaloux,
Dont frenesie le tempeste :
Plaisir n'y a en telle feste.

« Et que dirés vous de nous mesmes
Qui mettons en nous le discort ?
Tant on en voit tristes et blasmes
Qui avec eulx n'ont paix n'acort :
L'ung est musart, l'autre se tort²,
Et luy de luy se frappe et fiert.
Mal doit avoir qui son mal quiert.

« Or, puis donc qu'en tous endrois
Guerre se broulle³ et entremet,
Cuidons nous avoir aultres drois
Que Dieu et Nature n'ont fait ?
Ilz ont mis partout leur effect
Pour estre en son temps convenable.
Au besoing on s'aide du diable.

« Se pourfitable n'estoit guerre,
Jesucrist n'eust dit, ne n'eust peu¹,
Qu'il n'estoit point venu en terre
Pour mettre paix, mais glave et feu :
Volu a que par tout soit seu
Que paix mondaine n'est pas bonne.
Qui scet et veult tout bien ordonne.

« Guerre est de mal preservative
Contre paix et oysiveté,
Et d'autre part est purgative
Des biens qu'on a mal acquesté :
Par elle est homme exercité
En tout soing que mal ne l'acueille.
Mal tourne a bien mais qu'on le vueille.

« Tout ainsi que trop long repos
Remplit le corps de grans humeurs
Tant qu'il fault, par doze² et syrops.
Evacuer hors les douleurs ;
Ainsi paix enfle les mileurs
Et les rent bouffis chascun jour.
Santé n'est pas en ung séjour³.

« Par guerre on met les oyseux¹
Aux armes pour les faire et duyre,
Qui autrement seroient hargneux
Et ne feroyent qu'aux bons nuyre.
Guerre fait les pecheurs reduyre²,
Et aux bons croist la Providence.
Du mal fait bon avoir science.

« Se tirant n'eust persécuté,
La gloire des sains fut ternie ;
Des grans clercs le nom n'eust esté
S'il n'estoit aucune heresie ;
Chevalier n'aroit³ jalousie
En longue paix de porter lance.
Vaine picquée son sang lance.

« Regardez mesmes qu'en tous jeux
Les joueurs sont en diference ;
Chascun y est prompt et songneux
Qu'il ait de gaigner apparence ;
Coup contre coup, chacun s'avance
De peloter dez ou pelote⁴.
Fol et sage y garde sa cotte.

« Au peril voit on qui est fort,
En grant mesaise pacience,
Entre deux trompeux qui a tort,
Entre estourdis la sapience,
En grant poour la confidence.
En argent d'aultruy le preudhomme.
Guerre fait prendre sobre somme.

« Comme blé de jarbe¹ s'escout²
Au flayau³ et sault hors de paille,
Ainsy l'endormy sault debout
S'il oyt bruyt ou cry de bataille ;
Il craint [lors] que le debat aille
Autrement qu'il n'a le vouloir.
La fain fait eveiller le loir.

« Guerre est de Dieu le grant flaeil⁴
Et le mailet de sa justice,
Qui est aux bons paix et conseil
Et terreur au gourt et au nice ;
Car par luy cueur qui dort en vice
Se reveille et vers Dieu retourne.
Bon fait mettre a son peché bourne.

« Guerre nous vault ung retraintif
Pour serrer nos affections,
Et pour reprimer le motif¹
De nos folies conclusions.
Tost acoustre ses passions
Qui de disette attant l'assault ;
Soussy chastre le cueur [trop] bauld.

« Quant Hanibal serroit les portes
De Romme, et pres des meurs² estoit,
Moult de mal de diverses sortes
Cessa, qui devant s'i faisoit,
Pource qu'en paour, nul ne pensoit
Que soy deffendre a diligence.
Paour amende la conscience.

« Or, puis doncques que elemens
En terre par tout et en mer
Au ciel, es estoilles, es vens
Et en nous mesmes sans cesser,
Guerre regne et veult dominer,
Quelle paix querons nous avoir?
En grant riotte est³ povre avoir.

« Guerre est par tout et contredit,
Vous l'entendés par mes raisons :
D'elle fault faire son profit
Et des mulles en leurs saisons ;
Guerre a fait de bonnes maisons
Et eslevé plusieurs chetifz.
Tout vault a ceulx qui sont soutilz. »

— « Sestre, Sestre, se¹ luy respon ge,
Prenés mes ditz par bon endroit ;
J'ay dit et encore² le dis je
Qu'il est de pais de mal endroit,
En laquelle homme ne vauldroit
Sinon estre oyseux et gaudir.
Bien n'est bon dont vient desplaisir.

« Paix avoir avec ses pechés
Est une paix tres dommageable ;
Elle rent les faulx empeschés
Qui ont le cueur abhominable,
Ceste paix n'est pas véritable³.
Quant peché plaist et Dieu ennuye,
Bon est que telle paix ou fuye.

« Je despise paix par laquelle
On veult avoir biens temporez ;
La paix de Sodome fut telle,
Qui ot tant de biens preparés
Que par desirs desordonnés
Avec Gomorre feu gloutist⁴.
Payne suyt apres le delit.

« Paix qui donne l'occasion
De soy nourrir en ort plaisir,
De complaire a sa passion
Autant que corps y peut fournir,
Se¹ doit despriser et fouyr,
Car elle est de vertu maratre.
Plus nuyt flateur que qui veut batre.

« Paix qui fait l'homme transgresseur²
N'est paix sinon pour decepvoir ;
Debat en tel cas est milleur
Et seroit plus seur guerre avoir.
Ainsi j'entens, a dire voir³,
Que riotte vault mieux que paix.
Seurement marche qui a fès⁴.

« Quatre [paix] sont dont je n'ay cure ;
La premiere est avec le dyable,
Car il est menteur et parjure,
Grant barateur⁵ et non creable,
Envieux de bien pardurable,
Et ennemy d'humain lignage :
Du diable ne vueil foy ne gage.

« De luy sont sors et ars magiques,
De luy sont sorciers et Vauldois¹,
Charmes, enchanteurs heretiques,
Esprits familiers quelque foys,
Divinations, faulx explois,
Nygromance et ydolatrie.
Sage est qui de telz maulx se trie.

« La seconde est trop familiere ;
C'est de la char qui, doulce amye,
Laquelle est si doulce chambriere
Qu'elle veult qu'on la seigneurie,
Mais peu a peu, par flaterie
En doulx desirs nous assommeille.
Mal couvert plus qu'aultre travaille.

« Ceste² mignote³ jangleresse⁴
Nous sert de tous joyeulx plaisirs.
Boire, menger, vivre en sa gresse,
Prendre et user de tous desirs,
Hanter femmes a grans soupirs,
Abuser des biens de nature ;
De paix de char n'est rien qu'ordure.

« La tierce paix qui est du monde,
Est plaine de maulx bien hydeux :
Orgueil le haultain y abonde
Avec Bobanc¹, le glorieux ;
Le Treicherre² malicieux
Y est avec sa seur Rapine,
Le monde a moult de maulx encline.

« Vaine Gloire y vole a grans elles ;
Si fait Despit de son prochain.
D'autre part sont guerres mortelles,
Puis Pauvreté, Lang[u]eur et Fain,
Crainte, Paour, Ire sans frain,
Dur Desespoir et Mort soudaine,
Paix ne vault ou tant a de paine.

« La quarte paix n'a rien d'honneste,
C'est des ribleurs mauvais garsons,
Qui n'ont paix fors pour mener feste
Ou estre meurdriers ou larrons :
Ilz font guet en rue et cantons,
Et quierent de mal l'achoison³.
Pour plume avoir, plumon l'oison.

« Qui a telz gens prent accoitance,
Il s'en treuve mal adoubé¹ :
Il pert tout a dez ou a chance²,
Il desrobe ou est³ desrobé;
De vin ou femme est attrapé,
Et le plus souvent du gibet.
Le jeu vault tant comme on y met.

« Avec telz quatre ennemys
J'ayme mieulx guerre que la paix ;
Car, quoy que disent telz⁴ amys,
Ilz n'ont que travail a jamais.
Le plus qu'ilz ayënt sont soubjès
Ou effroy de leurs démérites :
Tel est le gain que les merites.

« Et, se vous voulés demander
Quelle paix je quiers et attens,
Difficille est de la trouver
Selon le cours de nostre temps :
Touteffois Dieu conduit les gens
Pour le mieulx, ainsy qu'il luy plaist.
Que a bon juge a peu de plaist⁵.

« Justice et Paix sont seurs germaines,
Filles de Dieu tout d'ung aage,
Si tres conjointes et prochaines
Qu'entre elles n'a sort ne partage.
Justice plane le passage
Par lequel¹ Paix va, vire et vient.
Sans Justice Paix ne se tient.

« Justice garde equalité.
Et rend a chascun sa desserte².
Elle fait en tort equité,
Et recompense ou y a perte :
Par ce point la porte est ouverte
Pour entrer Paix et converser.
En chemin plain fait seur aller.

« Justice garde ville et bourgs,
Royaulmes régit et empires.
Sans elle, tout va a rebours ;
Tousjours sans elle sommes pires.
Elle congnoist de toutes tires³
Qui cloche du pied ou va droit.
Terre est en paix ou y a Droit,

« Justice est tant fort necessaire
Que sans elle tout tumbe et fault.
Les injustes en ont affaire ;
Le larron sans elle ne vault,
Car, s'il ne partist¹ comme il fault
Aux siens le butin, on le laisse.
Justice maine tout en leesse².

« Ayons Justice, Paix viendra.
N'entreprenons rien sur aultruy ;
Rendons, s'aucun de nous en a,
Et plus tost hier qu'aujourd'huy.
Nul ne face mal nesqu'a³ luy ;
Gardons l'ordre de charité.
Paix ayme par tout equité.

« Telle paix est bien a priser
Qui sans mal engin se poursuit,
Qui veult, sans plus parfont⁴ puiser,
Ce qui au commun sert et duit ;
Mais⁵, quant avarice conduit
Ce que vertu doit pourchasser.
Homme pour prendre veult chasser.

« Paix est si bonne de sa part
Qu'elle veult qu'on l'ayme et la prise,
Sans y querir glic¹ ne hasart²
Que de vertu en elle assise³.
Celluy qui en fait marchandise
Abesse trop fort son honneur⁴.
Chysse⁵ marchant pert tost son eur.

« Telle paix que j'ay dit nagueres⁶
Se peut dire bonne a merveille,
Quise et amée d'anciens peres
Comme chose qui n'a pareille.
Repos et amour appareille
L'ung avec l'autre en seureté.
Ou paix a n'y a povreté.

« Bien nous appert⁷ de ses louanges
Et des grans biens dont elle est plaine,
Quant Dieu la mist en ses bons anges,
Et depuis en nature humaine,
Lors que, par amour souveraine,
Fist la paix du mors de la pome.
Pour bien de paix Dieu se fist homme.

« L'ange que¹ sa venue nunça
Luy mist a nom prince de paix ;
Et, quant la Vierge l'enfanta,
De nuyt en moult povre palais,
Les anges de Dieu, bons varlès,
Crierent la paix hault et cler.
Paix vault mieulx que targe ou boucler.

« Jhesus en temps de paix naquist
Pour monstrer² que paix luy plaisoit ;
Il la prescha et si la quist³
Par tous les lieux ou il aloit,
Car, a l'entrer, dire faisoit :
« Paix soit par tout en cest hostel !
Qui le veult suivir⁴ face autel. »

« Du salut de paix salua
Tousjours ses apostres et amis,
Et par ce⁵, bien nous enseigna
De faire ainsi en tous pays.
Celluy qui foy luy a promis
Ne luy doit en rien contredire.
Serviteur doit aymer son sire⁶.

« Paix nous reconseille¹ avec Dieu
Du quel nous tenons tout nostre estre ;
Paix met repos en chascun lieu
Et si fait l'homme se congnoistre,
Elle maintient moynes en cloistre,
Vielle a filler, chevre aux champs.
Paix paist² le riche et les meschans.

« Paix fait florir bois et prarie,
Bestes paistre en val et en mont.
Par elle, on va seur en Surye
Et ça et la par tout le mond ;
Marchans par mer et terre vont
Communiquer les biens de terre.
Fol est qui paix ne veult acquerre.

« Par paix les villes et cités
N'ont que faire de clorre porte ;
Povre et riche, de tous costés.
Y vient, a toute heure apporte.
Le povre menguë sa torte.
Ses aux, [ses] oingnons sans cremeur³.
Pain sec, en paix, a grant saveur.

« Villes florissent en justice ;
Chascun a le sien sans argu¹.
L'Eglise fait a Dieu service ;
Le larron est prins et pendu.
Droit est gardé et deffendu ;
Sainte parolle y est oye.
Qui paix n'ayme ne s'ayme mye².

« On y voit maisons reparer,
Eglises faire et hospitaulx,
Donner au povre et aumosner,
Subgès obeir et vassaulx ;
On y congnoist les biens des maulx ;
Verité s'y montre et decoeuvre :
En paix voit on qui fait bonne euvre.

« Mariages et aliances
Se procurent pour amys faire ;
Les souspecons et deffiances
N'ont en tel temps aucun repaire³.
On n'y oit ne crier ne braire⁴ ;
Chascun donne secours aux siens :
Telz furent les premiers anciens.

« Estudeset clercs y florissent ;
Savoir y a bruit et honneur ;
Bas et moyens les sages prisent ;
On n'y congnoist nul hoqueleur¹ ;
On tient es cours² bonne rigueur ;
Pratique n'y a jour ne delai.
En paix congnoist on clerc du lay.

« Les princes font jeux et tournois
Pour exerciter leur noblesse ;
Ilz font editz et justes lois
De paour que l'ung l'autre ne blesse ;
Ilz ne souffrent debat ne presse
Estre commise a leurs subgés :
Tous, par bon roy, sont soulagés.

« Par ce moyen, il est permis
Aler gayement par les boys
Corner, chasser dains et connis³,
Oyr du rossignol la voix,
Voler⁴ perdrix et tendre roiths⁵
Pour prendre cane et cormorans.
Il n'est plaisir que par bon temps.

« On besongne en plaisant repos,
On se repose en labourant¹ ;
On scert Dieu a chascun propos,
On acquiert grace en desservant² ;
Il n'y a maistre ne servant
Qui n'ait paix en sa conscience.
Qui paix a, assés a chevance.

« Dieu n'est jamais mieux honnoré
Ne servi qu'en temps pacifique ;
Le cueur y est mieux preparé,
Et volentiers a bien s'aplique ;
L'Eglise est noble et magnifique
De bons prestres et d'ornemens.
Paix est tresor de saintes gens.

« Tel temps jadis fut apellé
L'Age Doré pour sa valeur,
Jamais n'y fut mal appellé ;
Nully n'y proposa erreur ;
Saturne estoit roy et seigneur,
Paisible a merveille et bon roy :
Bon prince met tout en arroy³. »

« — Sestre, luy dis³ je, mon amy,
Vostre doubte n'est pas petite ;
Peu de gens sont, pour le jour d'huy
Qui s'en peussent bien faire quitte ;
Ne moy aussi, sans contredicte,
N'en puis les causes bien sçavoir.
En lieu obscur ne peut on veoir.

« Touteffois, selon qu'on congnoist
Des secrès de Dieu disonent⁴,
Dieu nous chasse et nous descongnoist
Pour nos grans pechés bien⁵ souvent.
Lesquelz, quant on est negligent
De punir, Dieu s'en mal contente :
Justice ayme ame penitente⁶.

« Je croy aussi que grant planté
Et habondance de richesse
Cause et fait la malheureté,
Que paix nous fuit¹ et nous delesse.
Ou il y a de biens largesse
Orgueil se boute et esmeut noise.
Peu chault a fol ou le bruit voise².

« En tel cas le dyable se mesle,
Du quel l'homme point ne se doubte ;
Il y souffle ire et entremesle
De courroux la despite route ;
L'homme par fureur n'y voit goutte,
Il se veult venger ou acroistre :
Dyable esmeut bien debat en cloistre.

« On voit aussi le plus des jours³
Que de Dieu nous ne faisons compte ;
Nous sommes aveugles et sours
Quant quelque ung ses lois nous racompte :
Nous n'avons point volenté prompte
D'acomplir ce⁴ qui⁵ mande et veult.
Qui n'obeyst paine l'acœult.

« Avec ce, nous somme¹ insensés
Et ne savons considerer
Les doubles dont y a assés
Et la guerre qu'on veult mener :
Car qui scet bien examiner
Combien doubteuse en est l'issue,
S'il n'est tout fol, le front² luy sue.

« Cresus s'en sceult³ bien ou tenir
Qui pour croistre sa seigneurie,
Fist de son lieu son ost partir
Oultre Haly⁴, fleuve d'Asye ;
Il perdit luy et sa maygnie⁵
Et fut serf de son ennemy :
En hasart tout met l'estourdy.

« De vieux exemples assés ;
Mais les nouveaux ont plus de foy,
Et vous certes assés congnoissés
Les fais de Richart vostre roy⁶ :
D'autres aussi bien je congnoy
Qui furent cause de leur chute.
Fort a fort sans danger delute⁷.

« Quatre ducs furent Bourguignons,
Dont assez fresche est la memoire ;
Desquelz les ungz sont sages et bons,
Les autres ont eu tant de gloire
Et d'entreprinse transitoire
Que leur maison en est confuse.
Eaue qui trop croist ront son escluse.

« Par ceste coquarde¹ imprudence
Nous ne pensons point aux dommages
Ne aux lourdes et grandes despences²
Que guerre fait, ne les oultrages.
Tout y va, corps, ame, biens, gaiges ;
La vie y branle, et nostre estat :
Ung seul coup donne eschec et mat³.

« Telle entreprise est de victoire
Pour pugnir le mal, ce⁴ dit on :
Je dis, moy, que c'est vaine gloire,
Et pour aultre ne combat on ;
Ars⁵ et trousses nous eslevon
Et nous mirons au lustre d'armes ;
Les mignons y sont les mains⁶ fermes.

« Tel cuide bien guerir la plaie
Qui peut estre l'empire fort ;
Tel s'esmeut, rechine et abaye
Qui reveille le chat qui dort.
Tel dit avoir droit qui a tort ;
Tel se tue qui rien ne gaigne ;
Tel fiert¹ autruy qui se meshaigne².

« Olofernes bien le congneust
Quant Jherusalem³ assiega ;
La noble Judic le deceupt
Qui la teste luy emporta.
Catiline aussi dueil porta
De soy eslever contre Tulles⁴.
Garde toy que tu ne reculles.

« Sombresset⁵ aussi, le feu conte,
Au dernier siège d'Orleans
Eut a son oste⁶ mauvais compte,
Qui fut tué d'ung cop leans⁷ ;
Ses gens qui la estoient seans
Se departirent tous confus.
Les plus rouges y sont deceups.

« Or prenés, comme plusieurs pensent,
Qu'ilz aient assez juste querelle :
S'ilz sont sages, ilz contrepensent
Que mal en seuffre leur cervelle¹ ;
Souvent leur vient autre nouvelle
Qui n'ont pu croire ne sçavoir.
Mal non preveu fait moult douloir.

« Qui estime son adversaire,
Foible en arme² ou mal acoustré
Se voit par son cuider deffaire ;
Plusieurs l'ont autreffois monstré ;
Ils ont plus dur que eulx rencontré
Qui leur a foncé leurs hyaulmes³.
Guerre fait perdre mains⁴ royaulmes.

« Prince qui a guerre se meut,
Foulle son peuple de grans tailles ;
Le fort et le foible s'en deult
En biens, en argent, en vitailles ;
Et tel n'a blanc, escus ne mailles
A qui on hoste⁵ lit et couche.
On a veu roy porter la pouche⁶.

« S'il marche avant, dedans Paris,
Tout y va de croq et de hanche¹ ;
Il n'y a buffet ne chalis,
Maison, n'eglise qui soit franche
Femme y seuffre force et grevance ;
L'espee espant sang par fureur ;
Le pire en guerre est le mileur².

« Justice est de prendre et rober ;
Tout y est permis et licite ;
Le meurdrier a beau parler³ ;
Chascun a mal l'ung l'autre incite ;
S'en telle guerre estoit hermite
Il pilleroit femme et enfans.
Chat enragé mengue ses fans⁴.

« Feu par tout se boute et alume ;
Villages ardent jusques aux fons ;
Il destruit chasteaux et consume
Les lieux et places des barons⁵ ;
Rien ne demeure aux environs
Que les saquemens⁶ tiennent sainc^*.
Villain cueur aultruy dueil ne plaint.

« Peuple s'en fuit, terre est deserte ;
Il n'y a paille, vin ne pain ;
Tantost en guerre on voit la peste¹,
On crie au meurdre et a la f[a]in :
La mere plaine de meshain²
Y a cuit et mengé son filz,
Tant est cueur famileux³ louvis⁴.

Entre tant de maulx et d'injures
Nul n'y a qui bien se contente ;
Les vainqueurs ont de grans murmures,
Car ilz n'en ont point mieulx de rente ;
Ilz ont perdu bagues⁵ et tentes,
Despendu harnoys et chevaulx :
Pour neant⁶ porte fol tant de maulx.

« Pour ceste cause les gendarmes
Se combatent souvent par piles⁷ ;
Ilz font entre eulx de grans vaquarmes
Et esmeuvent guerres civiles :
Ilz destruisent eux et leurs villes ;
L'ung⁸ tue, l'autre bat, l'autre grynce.
Tout le bon eur n'est pas au prince.

« Par vous mesmes le povés veoir ;
Le temps passé vous en fait sage¹.
Vous aves eu moult beau miroir
Depuis ving ans sur ce passage ;
Vous avez tins² piteux maisnaige
De changer et rechanger roys.
Prince n'est seur en telz destrois³.

« En tel desarroy l'homme oublie
Soy mesmes et sa condition ;
Il prent fiere et cruelle vie
Et laisse humaine affection.
Sans espoir de condition⁴,
Il cuide estre en cest estat né.
Guerre fait l'homme forsené.

« Nonnain despite froc⁵ et faille⁶,
Le chartreux y devient farouche,
Il ne chault au clerc comme il aille,
Vertu luy est a grant reprouche⁷,
Il n'a rien a mettre en sa bouche ;
Il se fait vil et est soulart :
Grant povreté fait le paillart.

« Apres telle vie, a grant paine
On remet les choses en ordre¹ ;
On a beau mettre gens en gayne²,
Frapper de verges et detordre³,
Nul ne veult son mal fait remordre⁴ ;
Coustume les a mis en train.
Lyon farouche ne prent frain.

« Tant de maulx a paix comparés
Font congnoistre que paix proufite ;
Point n'aves tort se desirés
De paix le bon et hault merite.
Elle est des aultres biens l'eslite
Qui en use selon droicture,
Sans paix ne dure creature.

« Prince qui change paix pour guerre
Est cause des maulx qui en viennent :
Il fait orphelins leur pain querre⁵,
Par luy grans⁶ pechés s'entretiennent,
Par luy garsons⁷ grans se soustiennent ;
Et faucile devient baniere.
Prince doit mettre en tout⁸ maniere⁹.

« Car, posé ores qu'il conqueste
En aultruy terre, bourg ou place ;
Venir peult en telle tempeste
Que force sera qu'il desplace ;
Ung temps vient comme l'autre passe,
Qu'on boute regnart¹ du perthuys.
Tousjours n'est pas le dyable a l'huys.

« Que proffite a vos precesseurs²
Le bruyt qu'ilz orent en la France ?
Que proffite aux autres seigneurs
Avoir vaincu gens a oultrance ?
Ilz³ n'ont pas fait grant demorance
Es païs par eux conquestés :
Biens mal acquis sont tost ostés.

« Les François jadis es Itales
Furent seigneurs pres de cent ans,
Et es parties principales
De Judée furent moult puissans ;
Mais tost apres, par cours de temps
Ilz⁴ n'y laisserent que leur nom.
S'on prent bien, aussi le rent on.

« Car on voit par experience
Que nulle gent sur autre regne,
Que tantost¹, en grant deffidence²,
Le vaincu ne treuve sa renne³,
Et son courage ne reprengne,
Tant qu'il recoeuvre liberté.
Fait de guerre n'est point arté⁴.

« Les Dannois jadis et Saxons
A vous, Anglois, firent grans armes ;
Ilz⁵ n'y gaignerent deux oygnons
Non obstant leurs grans vuaquarmes ;
Car, apres vos pleurs et vos larmes,
Ils vous laisserent⁶ telz que quelz.
Fort ennuyr n'est pas conquestz.

« Que vault aux Normans maintenant
Se Guillaume le duc vous prist ?
Je croy qu'en la guerre faisant
En son païs maint povre fist,
Et, combien qu'alors vous conquist,
Vous n'estiés Normans, n'eulx Anglois.
Chascun païs garde ses lois.

« Vous dictes avoir plusieurs tiltres,
Et ainsi vous le querellés
Que France, par drois non sinistres¹
Vous compete et que vous l'arrés²
Je croy, quant bien vous conferés³
Vos mises⁴, peu vauldra le jeu.
Bien assailly, bien deffendu.

« Sanglier pris a trop de levriés⁵
N'est pas gaigné, car trop il couste ;
On y pert matins et limiers
Et souvent celluy qui s'i boute.
Tres mauvaise est la malle couste⁶
Dont le recepveur pert ses gages.
Gardés l'ostel, vous serés sages.

« Lessons le monstier⁷ ou il est :
Qui est Anglois pour tel se tienne;
Qui est François le soit de fait ;
L'ung bon voisin l'autre soustienne.
Paix soit faicte, et ne nous souvienne
De bruict, de noise ne de guerre.
Vive France, vive Engleterre !

« Jamais Françoys bien ne saura
Jurer bi God¹, ni brelaré²,
By my trost³, my pourfitera
Ne maistre, milord ne seré⁴ ;
Anglois aussi, tant soit curé
Ne formera bien Pinqueny¹ :
Nature a bien tout départi.

« Pour ce, s'aucun vous veult mouvoir,
Sachés qu'il joue au malcontent⁶,
Et qu'il veult a son cas pourvoir
Combien qu'il n'en face semblent ;
Mais il se montre bien voulant
Et [par] vos mains [il] se veult croistre⁷.
Il fait bon le mauvais congnoistre.

« Deux voisins avoient jadis
Ung puissant homme leur voisin,
Auquel estoient ennemys,
Et luy menoient grant hutin⁸ :
L'ung et l'autre queroit butin,
Disant que le riche avoit tort.
Envye ne meurt jamais ne dort.

« L'ung s'en vinst a l'autre et luy dist
Qu'il s'esmerveilloit grandement
Que son grant père tant conquist,
Et il estoit si negligent
Qu'il ne s'adouboit¹ autrement
De si grant tresor recouvrer.
Qui quiert richesse, il doit ouvrer.

« Chascun dit qu'il est en tel lieu
Bien avant soubz une croix blanche ;
Vous estes assez près du lieu,
Fouyr y povés a puissance ;
Dictes que pelles ou avance,
Et qu'on besche en terre par font.
Plusieurs en parlent ; moult peu² font.

« Mais, pour en tout mieulx besongner,
Commencés y de vostre grace.
L'autre crut et fist assayer
Des le fondement de sa place ;
Il feist ung trou de grant espace
Pour d'illec aler au tresoir³.
Plusieurs sont plains de vain espoir.

« Moult de gens furent empeschés ;
Car, en mynant, pierres tumboient ;
Les ungs droit les autres couchés
En mynant tousjours cheminoient ;
Bien leur sembloit ja qu'ilz¹ avoient
Percé jusqu'au pié de la croix :
Mal cherce qui ne scet l'endroit².

« Le voisin, qui conseil donna,
Y envoya aide et secours ;
Mais depuis il contrepensa
Les hurs³ de Fortune et les tours :
Il vient souvent tout le rebours
De ce que homme pense et ravasse.
Tres mal estraint qui trop embrasse.

« En regardant la myne large,
Il se doubta de grant ruyne,
Et se recula de la charge
En faisant tousjours bonne myne ;
Or, comme il advient qu'on devine
Son malheur, l'autre eut deffiance.
Seur n'est qui prent d'autruy fiance.

« Or, tout soudain comme ilz minoient,
De la croix sort bruit espantable¹,
Tant qu'a peu tous y cuidoient
Y avoir perte trop coustable :
Pour prendre brochet trop couste able ;
Le voisin s'en trouva trompé.
Tousjours pert qui est attrapé.

« Il vit son voisin le lesser
Et au riche faire aliance ;
Il veöit pierres trebucher
Ça et la par folle ordonnance ;
De sa part il vit grant muance,
Et entre ses gens grant desroy.
En grant bruyt mal seur est le roy.

« De leurs mines furent boutés
Les pyonniers et s'enfouyrent ;
Ils furent plus contens que assés
Que corps et vie n'y perdirent,
Et depuis entre eulx guerre firent,
Ou y tuerent roys et ducz.
Fol est qui quiert trésors perdus.

« Le riche, a qui fut la croix blanche
A tous deux fut depuis conjoint,
Et tant qu'apres longue souffrance
L'autre en sa terre fut rejoint. »

« Cest exemple nous admoneste
De non chercher chose mal seure,
Car celluy doit tousjours de reste
Qui de rober aultruy labeure :
Jamais la prinse ne demeure
Qui ne soit d'aultruy recouverte ;
Denier ne vault dont s'ensuit perte.

« Et il advient, comme on a veu
Que tel part² et laisse son estre³
Qui a son retour n'est receu,
Et qu'en son lieu a aultre maistre.
Trop mieulx vault dont⁴ de s'en⁵ remettre
D'estre content de ce qu'on a⁶ :
A droit rent qui a tort prins a.

« Le roy Arnoul qui fist la diesme¹
Que vous, Anglois, paiez² a Romme,
Il partist plus que luy centiesme
Veoir les sains lieux comme preudhomme ;
Il s'en repentit, le saint homme,
Car son filz usurpa son sepstre.
S'en filz n'a foy, ou peult elle estre ?

« Celluy est sage réputé
Qui son estat conduit et garde,
Qui n'est convoiteux n'aheurté³
De prendre a trop de lieux moustarde⁴,
Qui soingne que la maison n'arde,
Content de sa bonne fortune.
Trop quiert qui veult happer la lune.

« Ung chien passoit sur une planche,
Portant en sa gueule du lart :
Il en vit l'umbre et eut creance
Que ce fust beaucoup meilleur part ;
Il luy en vint mauvais hasart,
Car en laschant l'une, il n'eut rien.
Tel quiert l'aultruy qui perd le sien.

« Nous avons raison toute clere
Que paix vault mieulx que guerre ouverte,
Car apres guerre vient misere,
Et terre en est toute deserte ;
Paix fault avoir, soit gaigne ou perte,
Tant au vainqueur comme au vaincu.
Arc ne dure tousjours tendu.

« Pour avoir paix, beste s'enfuyt
En forest et quiert les buyssons ;
Oyseau par nature se duyt¹
De hault voller, et les poissons
Descendent en l'eaue bien parfont,
Vers en terre, araigne en sa telle² ;
Paix est de chascun la tutelle.

« Or, Dieu nous vueilie paix donner,
Peu vault paix qui de Dieu ne vient ;
De ce³ ne puis plus raisonner,
Au palais entrer nous convient :
Si j'ay tenu halle de neant⁴,
Vous en estes trop consentens ;
A neant faire vous passés temps. »